کیا پک رہا ہے؟

قیمہ محفوظ کرنے کا طریقہ

قیمہ بھی آپ اکٹھا ایک جگہ زیادہ پکالیں اور پھر اپنی ضرورت کے مطابق
چھوٹے ڈبوں میں ڈال کر رکھ دیں۔ ضرورت کے وقت ایک یا زیادہ ڈبہ نکال کر اس
میں چاہیں تو سبزی ڈال لیں۔ مٹر‘آلو‘ پالک اور بینز وغیرہ یا پھر سادہ بھی
استعمال کرسکتی ہیں۔ اسی طرح گوشت بھی کافی مقدار میں بھون کر ڈبوں میں
رکھ لیں اور اسے بھی بعد میں سبزی کے ساتھ یا سادہ استعمال کرلیں۔ اس سے
کھانا بالکل تازہ محسوس ہوگا۔

سبزیاں محفوظ کرنے کا طریقہ

مختلف سبزیاں جب موسم ختم ہوجاتا ہے تو بہت
مہنگی اور نایاب ہوجاتی ہیں ان کو بھی آپ چاہیں تو فریزر کا فائدہ اٹھاتے
ہوئے محفوظ کرسکتی ہیں۔ ان میں ٹماٹر‘ لیموں‘ ہرا مسالہ‘ ادرک‘ لہسن‘ پالک
کا ساگ‘ گاجر‘ مٹر وغیرہ بھی شامل ہیں۔

لیموں اور ٹماٹرکو محفوظ کرنے کا طریقہ یہ ہے کہ
آپ ٹماٹر دھوکر خشک کرلیں پھر ان کو کاٹ کر ہلکا سا ابال لیں (بغیر پانی)
یا اگر چاہیں تو یونہی بلینڈر میں ڈال کر پیسٹ بنالیں اور برف جمانے والی
ٹرے میں کیوبز کی شکل میں جمالیں۔ جم جانے کے بعد ان کو ٹرے سے نکال کر
تھیلی میں بند کرکے رکھ لیں۔ موسم ختم ہونے یا مہنگے ہونے کی صورت میں آپ
کے پاس ٹماٹر کافی مقدار میں جمع ہوں گے۔

لیموں کا رس نکال کر اسی طرح کیوبز کی شکل میں جما کر رکھ لیں پھر چاہیں
تو شربت بنائیں یا کھانے میں استعمال کریں۔ اسی طرح ہرادھنیا‘ ہری مرچ‘
پودینہ‘ ادرک اور لہسن ملا کر بلینڈر میں ڈال کر پیسٹ بناکر اس کے بھی
کیوبز بنا کر رکھ دیں۔

مٹر موسم میں بہت سستے ہوجاتے ہیں انہیں چھیل کر
ابلتے پانی میں تھوڑی دیر ابال کر چھلنی میں ڈال دیں تاکہ پانی نکل جائے
ٹھنڈے ہوجانے پر اس کے پیکٹ بنا کر رکھ لیں۔

پالک کا ساگ بھی آپ محفوظ کرسکتی ہیں۔ چاہیں تو
ابال لیں ورنہ کاٹ کر اور دھو کر اچھی طرح پانی نکال دیں اور ایک تھیلی
میں ڈال کر رکھ لیں۔ گاجر کو بھی پتلی لمبی قاشیں کاٹ کر ابلتے ہوئے پانی
میں ڈال دیں۔ ایک یا دو ابال آنے پر چھلنی میں ڈال کر خشک کرکے رکھ لیں
پھر حسب ضرورت استعمال میں لائیں۔

لوکی کے ٹکڑے کرکے انہیں بھی ابال کر رکھ لیں۔
اسے آپ رائتہ‘ سبزی یا بھرتے کی شکل میں استعمال کرسکتی ہیں۔ بھنے ہوئے
گوشت میں ابلی لوکی ڈال کر آپ فوراً لوکی کا سالن بھی تیار کرسکتی ہیں۔

١۔ سبزیاں ہمیشہ ابلتے ہوئے پانی میں صرف چند منٹ کے لیے ڈالیں۔

٢۔ سبزیاں ڈالنے سے پہلے پانی میں دو کھانے کے چمچ چینی ضرور ڈالیں۔ اس سے سبزیوں کا رنگ خراب نہیں ہوگا۔

٣۔ فریزر میں رکھنے سے پہلے سبزیوں کو ٹھنڈا کرلیں۔

٤۔ تھیلی یا ڈبہ جس میں کھانا یا سبزی فریز کریں اس پر نام کا اسٹکر ضرور لگائیں۔ اس سے آپ کو تلاش میں آسانی ہوگی۔

٥۔ اسٹکر پر موٹے حروف میں لکھیں اور پھر اس پر موم بتی پھیر دیں تاکہ اس کی سیاہی نمی کی وجہ سے مٹ نہ جائے۔

٦۔ تھیلی ذرا مضبوط ہو تاکہ وزن سے یا اٹھانے رکھنے سے پھٹ نہ جائے۔

٧۔ ایک مرتبہ جو فریزر سے نکالیں کوشش کریں کہ اسے دوبارہ نہ رکھیں بلکہ استعمال کرلیں ورنہ اس کی غذائیت برقرار نہ رہے گی۔

ہمیں امید ہے کہ اوپر دی ہوئی ترکیبوں اور مفید مشوروں پر عمل کرکے آپ
اپنے آپ کو بہترین میزبان اور منظم خاتونِ خانہ کہلانے کا اعزاز حاصل
کرسکتی ہیں۔ اس سے نہ صرف آپ کے مہمان آپ کے گھر سے خوش ہوکر جائیں گے
بلکہ آپ کو بھی اپنے کام وقت پر اور سہولت سے انجام دے کر خوشی اور
اطمینان محسوس ہوگا۔